總網頁瀏覽量

2016年12月30日 星期五

買貨單

十二月十五日預訂左煙花,今日去攞時才發覺張買貨單唔見左,搵唔到。好彩我係碌咭有銀行單做證,咪去取貨囉,職員都無睇銀行單,只問姓名地址,就俾我。哈,元旦日有得玩!


2016年12月26日 星期一

聖誕節


今個聖誕節撞正星期六日,剛好我又買到平價火車票,一於出城購物。12月特價月,係時候幫阿女買衣服,佢地大個女又要自己選,我只負責俾錢。一日去左Eindhoven,一日去左Rotterdam飲茶,兩日都無煮飯,正宗放假呀!正!

2016年12月21日 星期三

第四次

今次學游水,老師要求我地手腳並用,我爬來爬去都係原來位置,不懂向前,應該係未懂得發力。之後老師教背泳動作,哈哈....我不敢游背式,怕沉。跟住係跳水,我都跳左三次。老師係續個動作教,都無連接性,有點摸不著頭腦!

2016年12月17日 星期六

有苦自己知



                                                 媽媽不易做,我就快俾阿女激死!

                                                  大女二女,一個天一個地。

2016年12月13日 星期二

過左第一關

今日去醫院睇報告,醫生話個肝無異常,只是有油,叫我減肥做運動。唉,叫做鬆一口氣!

但是個膽內有息肉,而我又經常胃痛,可能胃內都有息肉,轉我去睇胃科醫生,照胃和腸。現在又等醫院約時間,仍有第二關未過呀!

2016年12月7日 星期三

浮得起

今次係學游泳第三堂,我終於浮得起,免強浮到三份之一個橫池,繼續努力。
這個成績我已經好滿意,可惜仍未識游,下一堂再試。
也許是想學的決心強吧!

2016年11月30日 星期三

一日三轉

今朝一早幫老師帶鴨仔去博物館,因為孖女有份去,可以的話都無所謂。這間博物館(natuur museum)我都係第一次去,睇吓野,影吓相,本來Ok啦,可惜小朋友太嘈。






下午我獨自去醫院睇病,約左三點半,要早十五分到,方便量血壓磅重,點知到四點三才叫我入去,入到去醫生連接三個電話,我都無曬表情。佢寫紙叫我再驗血,又要我約時間照胃,等報告出來再去見佢。我快快脆走去驗血,否則一到五點鐘就收工,好彩我喺最後一個,回家已經是六點,我們食pizza送粥,中西合壁,全靠大女幫手湊妹。


晚上六點半,學游水時間到了又趕住出門,今次學腳部動作,唉!都未識浮,又點會郁。回家後上網,才知自己未做功課,明天無功課交。

2016年11月26日 星期六

學游水

十一月廿二日星期二,我上左第一堂游泳班,有點興奮,有點緊張。第一堂就叫我地學浮,老師話放鬆身體,自然浮起,我飲左好多水,都未浮得起。我時時刻刻都同自己講,阿女都學得識,我也可以,目標係暑假就可以齊齊玩水。不過現在是冬天嘛,上水這刻好凍,沖身時先出凍水再出暖水,我都怕自己會病。希望唔好落雪,因為我係踩單車去的,怕溶雪時地滑跌親。一月報名,十一月才輪到我,真係誇張。想避開冬天學游水,點知就係撞到正!


2016年10月31日 星期一

假期尾

不知不覺秋季假到了最後一日,明天又是上學的日子。這個假期都忙過不停。

星期一帶左大女去睇醫生,叫醫生寫紙去驗血,我自己也驗埋一份,算是陪大女吧! 接住係帶阿四阿五去補習。

星期二帶左阿四去整牙,之後帶女去溜冰,佢地就玩得開心,可憐我坐係冰場挨凍,晚上齊齊去食日本餐。

星期三帶左阿三去醫院打針,之前佢對針藥有感敏,所以今次要多留在醫院一粒鐘,加埋等巴士坐巴士,無左三粒鐘,回家後邊度都無去,我要好好休息。

星期四帶女行商場,佢地之前買左兩部手機用來上網玩遊戲睇劇集,好快就壞左,要攞翻去找維修,店主非常唔高興,叫阿女用時注意點,我地食完麥記就回家。

星期五店主打電話來,佢話買的時間短,可以賠個新的給我們,我馬上去攞。接住醫生打電話給我,佢話驗血報告出左,叫我去醫院睇病,心諗:會不會大件事呀!阿女都未養大,俾多十年時間我吧!無咩心機,留在家中執房。

星期六把後花園瓜花葉摘落來,準備過冬。打左電話俾我父母,講笑形式問下佢地想唔想過來,佢地話湊孫行唔開,等我們回去時再見吧。

星期日功課日,要做功課啦,無得偷懶,明天開學。

2016年10月22日 星期六

天氣一日比一日冷,我地已經換左冬天衣物,今日得八度。下星期一開始放秋季假期,我問阿女想去邊處玩,佢地話游水踩冰,吓?游水咪攪我,踩冰還可以。

之前曾經去過樹林,我地執左一大包栗子回家,慢慢食。







今日好凍我係後花園摘左些瓜入屋,相信再過些日子,瓜都無得再生長,要摘。








2016年10月11日 星期二

失憶

今日放學時忙了攞手袋,只是穿了外套,拿了書包就走人。回家後才發現手袋不見了,馬上回學校,心想身家性命財產係手袋裏,無左好大件事。數數手袋有咩先,銀包銀行咭手機護照還有咩咭醫療咭搭車咭超市優惠咭,補領太煩,採住單車飛咁快回到學校,有個老師一見到我就問係唔係回來攞手袋,個手袋係校務處,我打開一睇心都定,一件都無小。好在有老師在場,否則銀包手機一定無左!




2016年10月6日 星期四

怒氣事

今日發生左兩件怒氣事,

事件一,老二唔聽話,我叫佢努力讀書,唔好派廣告紙賺錢,佢唔理我,約左人上門談論,又答應左人要做。我明知佢三分鐘熱度,後果等我收拾。

事件二,話說我地無俬傢車,門口泊車位俾鄰居佔用,但我地有單車,阿女放學後就泊係自己門口行人路位。今日鄰居話我地,單車泊得太出,大風一吹好易撞到佢部車,我大女話俾佢知這部單車不是我們的,是女兒的同學的,我叫左這個同學出去,佢仍然係度嘈,我地無理佢,事後我和大女討論,點解佢唔泊車自己門口位,要經常泊車我地門口,就算我們部單車吹倒撞落佢部車,誰之過,無保險當天災吧,我肯定唔會俾錢佢。佢住在前二家,又不是隔籬屋,點解要泊車我門口?!

2016年10月5日 星期三

十月份

十月頭,孖女生日的日子,佢地日日提住,開始倒數。係啊,她們已經有十歲喇,由可愛的BB變成吱喳妹,一點也不可愛!好在她們快高長大,比我走得快,我輕鬆左,但也怒氣左,我就快無氣無力。

大孖比較聰明,但學習能力差,IQ 和 EQ 不成正比,老師和醫生都搵唔到原因,只好捉佢年年檢查。不知為何佢大大下似足老二,成格和樣貌都似,換然之,我又多一個麻煩女。

細孖四支發達頭腦簡單,好在仍聽我話,叫得郁又肯做,但會問我攞糖和薯片做報酬。

2016年9月26日 星期一

擺檔

今日可以擺地攤賣二手貨的日子,我攞左兩部舊單車,十一條阿女用過的裙仔(carnaval kleding)擺係公園賣,阿女都攞左佢地的玩具去賣,可惜賣貨的人多過買貨的人。我們由十點半坐到二點,我只是賣左六條裙仔,賺左六元。老二賣左三件玩具,賺到一元零十個仙,其他賣唔去。二點半開始全場全免費任人要,我當然唔制,快快手收檔走人。

2016年9月24日 星期六

壓力

開左學三個星期,功課一大堆,新的同學,新的老師,新人士新作風,有點應接不下。下學期要考公開試,要文憑的話,上學期就要死讀死追。課室內的氣紛有點緊張,加上老師給我們的壓力和要求,我有點想逃。

以往的心態,一把年紀去讀書,重回校園,覺得自己青春仍在,每每想起少年時的我。現在的心態,一把年紀讀咩書,讀極都唔識,我永遠都是龜兔賽跑的老龜,仍有努力中,未見終點。有想過停一年,回下氣再讀,但又怕把書本忘記了。

2016年9月15日 星期四

開花結果

每年夏天我都會種瓜,眼見種子發芽成長,是一種樂趣。
開花結果之後,食落肚,又是一份滿足感。
今年貪心左少少,種左三款瓜,還有杞子。




魚翅瓜蝦米粉絲煲



合掌瓜煲粥


青瓜,即摘即食。


杞子沖茶飲


2016年9月3日 星期六

暑假尾聲

下星期一開學,這幾天勤勤力力打掃家居。
懶洋洋的暑假太正!
瞓飽就食,食飽就上網,無所是是就出街。
日日瞓到中午,晚晚到二三點才睡,這才是假期,這才是享受!
這個夏天養到肥肥白白。

2016年8月29日 星期一

印花safaripark

在超市收集左許多印花,帶女去動物園有折。早早上網預定左,到了星期四這天天氣好熱有三十二度,熱到動物懶洋洋,我地不斷飲水不願多走,好在這裏夠大,可以坐車坐船觀光。



2016年8月17日 星期三

一日遊

之前聽到有旅行團一日遊去比利時睇花壇節,我報名參加,阿女都興高彩烈,點知人山人海兼無咩節目安排,變左自由行。我感覺俾人騙了,阿女話無野玩,只是影了幾張,去麥記食個包,行下商店,就回程。我話,我負責俾錢都無你更多怨言!



2016年8月9日 星期二

八月八

今日帶女去唐人街食大餐,侍應姐姐認得我們,說了聲她們長大了。
對呀,又是這間,一年兩次,食左十幾年,口味對上,無須改。
接住我們行下街,買下雜貨,買下西餅,又過左一日。
最開心係買到我的至愛...荔枝,又清又甜又多肉,正呀!

2016年8月7日 星期日

22/7--8/8

七月尾一連十日都是kermis機動遊戲擺街,我帶女玩左五日,當然也花了不少錢。

八月份頭一星期,博物館,街市,商店,泳池,又帶女四圍游。

暑假嘛,當然要找些活動給小朋友玩啦!

2016年7月30日 星期六

小禮物



七月廿九日,大女送左件小禮物給我。



這是她的一點心意吧!

這,又是她畫的,也是我的禮物。

有一女懂得孝順,終於有回報。








2016年7月15日 星期五

暑期工

大女今年十六歲可以做暑期工,由四月份開始我天天叫她搵工,她次次都推說等埋同學一起去找。現在七月份,她才說要上網找,要寫求職信,要填個人資料,她有點迷惘,所以未找到。

我問,你的同學呢?她說有同學自己找到工作,有些早就有做周未工作,所以暑期工容易找。

剛好有朋友問我,大女有工開嗎?可不可以幫忙做工,因她妹妹病了缺人手。就這樣,大女終於有工做。

仍有一星期

仍有一星期才放假,今日收到成績表,阿女成績麻麻地,似足我。點解佢地個樣唔似我,成績差似足我!

自己俾別人努力,成績不及別人。帶女補習,補足一年,阿女成績依然麻麻地。

心裏難受啊!!

生活小煩惱

由現在開始,垃圾兩個星期收一次,早就臭左。今日收垃圾時,有人檢查垃圾是否分類,無的話就被檢控。

心想,政府真係惡,叫人分類可以,但兩星期倒一次垃圾,點解決。食物這格有餸頭餸尾,有生有熟,爛出蟲。

2016年7月9日 星期六

七月份

七月份,人尚未放假,但個心已經不想上學。讀書一年又一年,考試一次又一次,但成績麻麻地,有點氣累,放下暑假透下氣也好! 或者放假期間再下苦工吧!

2016年6月29日 星期三

六月尾

六月尾學期尾,剛剛考試完畢,等放暑假。眼見他人安排去旅行,自己無節目,有點心酸,好想去埋一份。朋友話去土耳其四百歐一位住十日,大小同價,我覺得貴,而且一拖五,怕她們走散了又言語不通,有點冒險,都係算吧!去年剛回了香港,如果再回,怕家人洗錢。其實自己都有能力,但老豆細佬個個熱情招待,又出錢又出力,雖然感動但過意不去,都係隔三年一回好些。今個暑假多數都係懶洋洋留在家中渡日,和阿女日對夜對,遲早對出火。

2016年5月26日 星期四

誰是學生

今日帶女去醫院打針,等候期間,眼見許多家長手拿手機只顧上網,小朋友自己玩還者看看書。有一個家長她的小朋友打完針,未哭完,阿媽就快快手拍照,之後才安慰他。我就自己坐埋一邊讀生字,阿女忙於打機,我問她誰是學生哥,點解你唔讀書,佢話無興趣。難到我有興趣嗎,只為生活罷了,帶女睇病又是我,打電話叫維修又是我,求人幫忙又是我,受盡冷言冷語又是我,我能不自強嗎?!但無法解釋俾阿女聽,亦唔希望佢受同一苦難才明白。

2016年5月20日 星期五

油畫

大女在學校裏學油畫,佢偷左我當年的結婚相照住畫,係母親節這天她攞出來送俾我。我把這畫掛在床頭!十七年前的相片,從現眼前,可嘆自己老了,身形也變了。細女也看不出來,這是她的爸媽,歲月無情!



手作

冬天時朋友煲腊味糯米飯,有糯米用剩,俾咗我。我開始包粽子啦,今次上網學下點包,又睇下書,總算包到隻似樣的。

現在網絡世界學廚好方便,有份量,有步驟,有做法,也有人做埋俾你睇,學起上來容易許多,我剛學識做牛脷酥,食左好多條。對,我想學的,就我想食的,要滿足下自己嘛!

2016年5月15日 星期日

Mei markt

一年一度mei-markt ,由星期六晚上開始到星期天下午五點鐘結束。星期六第一時間帶左大女去行下先,我買左個細細鞋架,打算放係士多房擺工具。我又買左三個花盆,夏天時種種花,都係一種憂閒的生活,買左四件用左五歐,我覺得Ok啦!打算星期天帶女再去過,日光日白,睇得清楚。無聊生活中的一點生活方式!

2016年5月2日 星期一

飲茶

星期六帶女飲茶,對,我又大鄉里出城。去唐人街行下,飲下茶,買下雜貨,買下西餅,坐下火車,坐下巴士,又過左一日。好在她們都長大了,能自己照顧自己,又幫我攞下雜貨,感覺輕鬆了許多。飲茶的時候,我問母親節快到了,是否你地請我呀?佢地話無帶錢!吓,原來同阿媽出街不用帶錢!!

2016年4月18日 星期一

見家長

學校派成績表,又要見家長,個個女成績都退步了。
大女給我的理由是....現在中三了,越來越深,分數自然跌落。
二女話...和大姐讀的課程不一樣,不能做比較。
我...無話可說。

阿三係學校成績一般,老師說...下一年成績無進步的話,中一派位考試難,仍有一年時間追,努力吧。
我只好叫三女讀書做功課,今日阿三做完功課後給我檢查,發覺佢做溜左許多,我當然氣頂,駡她只顧玩手機,我緊佢唔緊。

日後如何生活,都係靠她們自己,我大動肝火兼做醜人,與我何益!!!

2016年4月8日 星期五

考試

今日要考試,考左會話(spreken),成績嘛共三十分,我考到廿五分。星期三這天考左聆聽(luisteren),下星期一公報成績,下星期三繼續考試。我當然希望自己有進步啦!

今日又帶女去醫院打針,我順便照左我排骨(係背脊骨),因為我經常腰酸背痛,下星期出報告。

我日日都好似好忙,時間過得特別快。

2016年4月7日 星期四

經濟問題

經濟不景,商店執完一間又一間,今次係blokker分店結業,上星期全場減10%或者減20%,我睇都唔睇,心諗減得少,無興趣。今個星期全場減30%~40%,心癢走左入去,結果又買左些廚房用具做後備。回家後想想,我買來做甚麼,後備嘛等於不需急住用啦,我會不會先洗未來錢呢!

2016年3月28日 星期一

執笠

歷史性的時刻V&D執笠,日日排長龍爭靚貨,我都爭埋一份,原價70毆一個背囊,現在28歐一個,我買比阿女做書包,中學生嘛書又多又重,又要牌子好,買個堅韌些也好,點知排長龍比錢,排左一粒鐘。下一層買手錶,原價35歐一隻,現在5歐一隻,我買左兩隻,一隻比大女,一隻比自己,買完之後有點悔意,咁平,點解唔買多兩隻,但排長龍喎,算吧!都唔明白點解書包減更少,我們家最需要的就是書包。下次再去過,但要等阿女開學先,佢地放復活節,帶住她們不方便,但到時仍有貨嘛?!哈,我喺咪好貪心呢。

2016年3月22日 星期二

交功課

我明知自己做一日功課,做唔完,所以由星期五開始做到星期天。星期一終於有功課交,點知老師收到後,炳到我地全班同學都無聲出,佢話作文係A4紙一篇要寫滿字,但我地有些人寫到大大隻,有些人隔行寫,所以字數不夠。又話我地身為父母,叫自己的孩子聽老師話,又叫自己的孩子不要偷懶,自己又做不到,不能以身身教,若孩子知道了,你地又如何面對!最後佢話我地以後寫文章計字數,五百字一篇文。我心諗你早D講啦,五百咪五百囉,寫字大隻或細隻係一種習慣啫,洗唔洗咁呀?!我地唔隔行你睇到咩,有位比你改正咩??算,我忍你,現在係我自己要來讀書,不是你強逼我來讀。

2016年3月14日 星期一

星期天

星期天功課天,一坐低就是大半天,查字典,做句子,閱讀文章。唉,有時候真想放棄,唔做讀書人,轉做電視迷有多好!不過自己知自己事,唔讀書會變文盲,為了日後生活,都係繼續讀吧!十年寒窗苦讀,而過一半,放棄了太可惜,未見成績不甘心。堅持,再堅持,忍無可忍,重新再忍。

2016年3月8日 星期二

演講

今天上學,老師比左個議題,(心目中的英雄),或者(心目中的重要人物),叫我們輪流演講。我諗都唔諗,就話,我心目中的重要人物係我老爸,當然要講吓他有多好啦,點解會選他。講完之後,老師給我的評語是,說話未夠嚴肅,詞匯用得太少,但語調正確,係發自真心,議題中老爸的性格和我極為相似,應該係有其父,必有其女。我聽完之後,大笑起來,引起其他同學都笑埋一份。其實我笑中帶點傷感,因為老爸身在香港,不在我身旁!

發夢

又發夢,夢見自己會游水,係河底下尋寶,又係激流中來來回回,好似似是而非,又好似好好玩。嘻,我本不會游水,點解夢境中的我,玩得咁開心!

2016年2月29日 星期一

病左

我病左幾天,應該係感冒,我飯都無煮,阿女食薯仔,食pizza,等佢地自己攪點。我起唔到身,全身骨痛加埋頭痛,痛到頂唔順,搵藥食,又食到胃痛,跟住係皮膚敏感,又食敏感藥。今天終於起身煮飯,但整天都覺得自己好凍!

2016年2月12日 星期五

又過年

農曆年,帶女飲茶,叫到成檯都係點心,她們食得好開心。食到一半,我起身同阿女講,我走先,你們留在這裏洗碗吧!她們張大個口望住我,我笑笑口,阿四估中了,我係去廁所,她們鬆一口氣繼續食。今年可能加左價,食左十六籠共九十歐。

2016年1月18日 星期一

小雪

昨天晚上落左一場小雪,今日帶女去游水,回家時跌低左,現在條腰骨好痛。小雪嘛,快溶!路又滑又濕。好在今日係阿女攞游水證書的日子,考到diploma B,以後不用帶女去學游水。

2016年1月5日 星期二

又一年

過完聖誕又到新年,新年前夕我左煙花回家給小朋友玩,當然我也會玩埋一份啦!今年有許多新鄰居入伙,這邊幾條街零晨十二點都齊齊放煙花,滿天煙花,四面炮仗聲,熱鬧得很。我握住手機不停影,阿女又是這樣,跟住我們又放埋份,心情有點興奮,放到零晨二點燒完。新年快樂,happy new year!